Sonra başçıdan soruşarsınız niyə futbol oynaya bilmirik... - İTTİHAM

Sonra başçıdan soruşarsınız niyə futbol oynaya bilmirik...
Futbolu kütləviləşdirməyin, bu idman növünə daha çox uşaq cəlb etməyin təbliğatının aparıldığı bir vaxtda Azərbacanın Ağstafa bölgəsində yerləşən, onlarla uşağın futbol oynadığı süni örtüklü meydançanın sökülməsi planlaşdırılır.

Bu haqda Sport7.az-ın redaksiyasına rayondakı mənbələrdən məlumat daxil olub. Məlumata görə rayonun əsas, yəni təbii örtüklü stadionunun yanında yerləşən süni, 20x40 metr ölçüsündə olan meydançanın İcra Hakimiyyəti tərəfindən sökülməsi planlaşdırırlır. Özü də maraqlıdı ki, bölgədə futbolun inkişafına həvəs göstərməyən rəhbərlik bunu, absurd səbəbdən, adi bir ev sakininin şikayətinə görə etmək istəyir.

Məsələ burasındadı ki, sözügedən meydançanın kənarları hündür olsa da, üzəri açıqdı. Yəni, top meydançanın çəpərini aşanda tez-tez yaxınlıqda yerləşən evin həyətinə düşür ki, bu da ev yiyəsinin narazılığına səbəb olub. Nəticədə, "yuxarılar"da da adamı olan həmin vətəndaş Bakıdan birbaşa Ağıstafaya zəng etdirərək məsələnin çözülməsini istəyib. İcra başçısı isə çıxış yolunu meydançanı sökdürüb, yerinə asfalt döşəməkdə görür. Hansı ki, meydançanın üzərini örtmək elə də böyük vəsait tələb etmir və daha ucuz başa gələr. Maksimum 500-600 manatlıq xərc çəkib meydançanın üzərini örtməkdənsə, rayon rəhbərliyi baha başa gələn addım atmaq niyyətindədi.

Sözügedən meydançada isə hər gün demək olar 80-100 uşaq futbolun sirrlərini öyrənir. Hətta indi klublarımızda çıxış edən bəzi futbolçular da məhz sözügedən bölgədə yetişib. İndi orada məşq edən uşaqların valideynləri, ümumiyyətə Ağstafanın futbol ictimaiyyəti məsələ ilə bağlı Gənclər və İdman Nazirliyindən tutmuş digər aidiyyatı orqanlara qədər müraciət ünvanlasalar da şikayətlərinə baxan yoxdu. Hətta birbaşa AFFA-nın baş katibi Elxan Məmmədova da məktub ünvanlanıb. Ancaq UEFA-da hansısa vəzifəyə seçilmək üçün can atan və buna başı qarışan Elxan bəy göndərilən məktublara, edilən müraciətlərə heç gözucu da baxmayıb. Digər məsələ ondadı ki, sözügedən meydança ölkənin Gənclər və İdman Nazirliyinin balansına da salınmayıb. Çünki belə bir hal olsa həmin meydançaya xidmətçilər və qarovulçular təyin edilməlidi, problemlər yoluna qoyulmalıdı ki, bunun üçün nazirlik nə artıq xərc çəkmək, nə də başını ağrıtmaq niyyətindədi. Maraqlıdı görəsən Ağstafanın Gənclər və İdman Şöbəsinin rəhbəri hara baxır? Güman ki, o da idmana yaxın insan olmadığı üçün məsələ ilə bağlı hər hansı addım atmaq istəmir. Hər halda istəsəydi, indiyə qədər problemi yoluna qoymuş olardı. Nəticədə bu qədər uşağın futbol təhsili aldığı, pis vərdişlərdən uzaqlaşmaq üçün üz tutduğu meydança, belə demək mümkünsə, havada qalıb. Nə düzəltdirən var, nə də fikir verən. AFFA isə boş-boş layihələrə pul xərcləməkdə davam edir.

Hər halda bunlar mənbəmizin bildirdikləridi. Həqiqətən onlarla uşağın futbolun sirrlərini öyrəndiyi meydançanın sökülməsinin planlaşdırılmasına səbəb, bir vətəndaşın həyətinə top düşməsidisə, bu çox absurddu. Hələ üzərini örtmək əvəzinə meydançanın sökülüb yerində asfalt salınması fikri daha da gülməlidi. Buna izah tapmaq çətindi, çox çətindi...

P.S. Əslində, pis "ideya" deyil. Axı Azərbaycanda indiyəcən üzə çıxan ən yaxşı futbolçular elə məhlələrdə, asfaltda, qumlu, torpaqlı, balıqqulağı ilə dolu stadionlarda yetişib. Yəqin ki, aidiyyatı orqanlar da bu "prinsip"i əsas götürərək, məsələni o şəkildə çözməyə üstünlük verir.

Sonra başçıdan soruşarsınız niyə futbol oynaya bilmirik...
Sonra başçıdan soruşarsınız niyə futbol oynaya bilmirik...
шаблоны для dle 11.2
Tarix: 25-10-2019, 15:42




Xəbər lenti