Vaşinqton administrasiyası hesab edir ki, Venesueladakı siyasi qüvvələrin prezident səlahiyyətlərinin müxalifət liderlərindən birinə Edmundo Qonsalesə verilməsini müzakirə etməyə başlamasının vaxtı çatıb.
Yeniavaz.com xəbər verir ki, bu versiya ABŞ-nin dövlət katibi Entoni Blinkenin cümə axşamı dərc olunmuş bəyanatında öz əksini tapıb.
“Təkzibedilməz dəlilləri nəzərə alsaq, Birləşmiş Ştatlara və ən əsası venesuelalılara aydındır ki, Edmundo Qonsales iyulun 28-də Venesuelada keçirilən prezident seçkilərində ən çox səs toplayıb”, - Amerikanın xarici siyasət idarəsinin rəhbəri bəyanatda bildirib.
Blinken ABŞ-nin Venesuelada demokratik normaların bərpasını tam dəstəklədiyini və xarici tərəfdaşlarla birlikdə onları gücləndirmək imkanlarını nəzərdən keçirdiyini qeyd edib.
“İndi Venesueladakı partiyaların Venesuela seçki qanunlarına və venesuelalıların istəklərinə uyğun olaraq hakimiyyətin hörmətlə, sülh yolu ilə keçidini müzakirə etməyə başlamasının vaxtıdır”, - deyə Blinken əlavə edib.
